ឡុងដ៍៖ ចក្រភពអង់គ្លេសឱ្យដឹងថា ខ្លួនកំពុងបញ្ជូនអ្នកជំនាញដើម្បីជួយអ៊ុយក្រែនក្នុងការប្រមូលភស្តុតាង និងកាត់ទោសឧក្រិដ្ឋកម្មសង្រ្គាម។

អ៊ុយក្រែននិយាយថា ខ្លួនកំពុងស៊ើបអង្កេតឧក្រិដ្ឋកម្មសង្គ្រាមដែលមានសក្តានុពលប្រហែល ៧ ៦00លើក បន្ទាប់ពីការលុកលុយរបស់រុស្ស៊ីកាលពីថ្ងៃទី២៤ ខែកុម្ភៈ លើអ្នកជិតខាងរបស់ខ្លួន។

«រុស្ស៊ីវាយប្រហារអ៊ុយក្រែន និងប្រព្រឹត្តអំពើឃោរឃៅ រួមទាំងប្រឆាំងនឹងស្ត្រីផងដែរ។ អ្នកជំនាញអង់គ្លេសនឹងជួយលាតត្រដាងការពិត និងឱ្យប្រធានាធិបតីរុស្ស៊ី វ្ល៉ាឌីមៀ ពូទីន ទទួលខុសត្រូវចំពោះទង្វើរបស់ខ្លួន» នេះបើតាមរដ្ឋមន្ត្រីការបរទេសចក្រភពអង់គ្លេសលោកស្រី Liz Truss ។

ការប្រកាសនេះធ្វើឡើងនៅពេលដែល លោក Truss ធ្វើដំណើរទៅកាន់ទីក្រុងឡាអេ ដើម្បីជួបជាមួយប្រធានតុលាការឧក្រិដ្ឋកម្មអន្តរជាតិ ចៅក្រម Piotr Hofmanski និងសមភាគីហូឡង់លោកស្រី Wopke Hoekstra ។

សេចក្តីថ្លែងការណ៍របស់ការិយាល័យបរទេសបានលើកឡើងថា៖ «ក្រុមអ្នកឯកទេសនឹងជួយដល់រដ្ឋាភិបាលអ៊ុយក្រែន នៅពេលដែលពួកគេប្រមូលភស្តុតាង និងកាត់ទោសឧក្រិដ្ឋកម្មសង្គ្រាម ហើយនឹងរួមបញ្ជូនអ្នកជំនាញខាងអំពើហិង្សាផ្លូវភេទដែលទាក់ទងនឹងជម្លោះ»។

ពាក់ព័ន្ធនឹងសង្រ្គាមនៅអ៊ុយក្រែននេះ ទីក្រុងមូស្គូនៅតែបន្តហៅសកម្មភាពរបស់ខ្លួនថាជា «ប្រតិបត្តិការពិសេស» ដដែល៕